GSTના અમલ અગાઉ બજાર રેન્જબાઉન્ડ રહેવાની ધારણા

મુંબઈ: આગામી ટ્રેડિંગ સપ્તાહે ડેરિવેટિવ્ઝ એક્સપાયરી, ક્રૂડના આંતરરાષ્ટ્રીય ભાવની વધ-ઘટ અને વિદેશી રોકાણકારોના રોકાણપ્રવાહ વગેરે પરિબળો શેરબજારની ચાલ પર અસર કરશે.

બજાર નિષ્ણાતોના જણાવ્યા અનુસાર પહેલી જૂલાઈથી GSTનો અમલ થાય તે અગાઉ ઈક્વિટી માર્કેટ રેન્જબાઉન્ડ રહેવાની ધારણા છે. GSTના અમલની અસર ચકાસવા રોકાણકારો સાવધ વલણ અપનાવી રહ્યા હોવાથી આ સપ્તાહે બજાર ઘટાડા તરફી વલણ સાથે રેન્જબાઉન્ડ રહેવાની ધારણા છે, તેમ ઝાયફિન એડવાઈઝર્સના ચીફ એક્ઝિક્યુટિવ દેવેન્દ્ર નેવગીએ જણાવ્યું હતું.

GSTના અમલ ઉપરાંત ગુરુવારે ડેરિવેટિવ એક્સપાયરીને કારણે બજાર વોલેટાઈલ રહેવાની શક્યતા છે. F&Oમાં ટ્રેડર્સ તેમની પોઝિશનને રોલઓવર કરશે, તેમ ટ્રેડ સ્માર્ટ ઓનલાઈનના સંસ્થાપક ડિરેક્ટર વિજય સિંઘાનિયાએ જણાવ્યું હતું.

26 જૂનથી શરૂ થઈ રહેલા નવા ટ્રેડિંગ સપ્તાહે ECI (એઈટ કોર ઈન્ડ્સ્ટ્રીઝ ઈન્ડેક્સ), વિદેશી દેવું અને રાજકોષીય ખાધના મેક્રો ડેટા જાહેર થશે. રોકાણકારો આ તમામ ડેટા પર પણ નજર રાખે તેવી સંભાવના છે.

આ ઉપરાંત બેન્કિંગ સેક્ટરમાં સ્ટ્રેસ્ડ એસેટ રીસ્ટ્રક્ચરિંગ અંગેના સુધારા ઈક્વિટી ઈન્ડાસિસને નીચા મથાળે સપોર્ટ કરે તેવો અંદાજ છે.

જિયોજિત ફાઈનાન્શિયલના રિસર્ચ હેડ વિનોદ નાયરે જણાવ્યું હતું કે, બેન્કિંગ સેક્ટરના સુધારા, નીચા ફુગાવા અને રેટ કટની વધતી શક્યતાને ધ્યાનમાં લેતાં બજારને નીચા મથાળે ફરી ટેકો મળવાની સંભાવના છે.

ડોમેસ્ટિક ઈન્સ્ટીટીયૂશનલ ઈન્વેસ્ટર્સ (DIIs)પણ બજારમાં નીચા મથાળે લેવાલી કરશે. નેશનલ સિક્યુરિટીઝ ડિપોઝિટરીના આંકડા અનુસાર 19-23 જૂનના ગાળા દરમિયાન વિદેશી પોર્ટફોલિયો રોકાણકારોએ (FPIs)ઈક્વિટીમાંથી રૂ.1,053.12 કરોડ અથવા 163.86 મિલિયન ડોલરનું મૂડીરોકાણ પરત ખેંચી લીધું હતું.

આગામી સપ્તાહે અમેરિકન ડોલર સામે રૂપિયો 64.30-70ની રેન્જમાં રહેવાની ધારણા છે. કોટક સિક્યુરિટીઝના કરન્સી ડેરિવેટિવ્ઝના એવીપી અનિન્દ્યા બેનરજીના જણાવ્યા અનુસાર આપણે વૈશ્વિક ફાઈનાન્શિયલ માર્કેટ પર નજર રાખવી પડશે. અમેરિકામાં સ્ટીમ્યુલસ પાછા ખેચાવાની શરૂઆત, બેન્ક ઓફ જાપાન અને ઈસીબીના નિર્ણયોથી વોલેટિલિટી વધશે અને તેની રૂપિયા પર પ્રતિકૂળ અસર પડી શકે છે.

જો કરન્સી માર્કેટમાં જોખમનું તત્વ વધશે તો સ્પોટમાં રૂપિયો 64.80-65ના સ્તરને પણ સ્પર્શી શકે છે. ગત સપ્તાહે અમેરિકન ડોલરની સરખામણીમાં રૂપિયો 10 પૈસા નરમ પડીને 64.53 થયો હતો.

ટેકનિકલ રીતે જોતા નિફ્ટી 9,699 પોઈન્ટનું નજીકની પ્રતિકાર સપાટી વટાવ્યા બાદ અપટ્રેન્ડ દેખાડશે. આ સપ્તાહે પણ બજાર કેરેક્શન દર્શાવી રહ્યું હતું ત્યારે પણ નિફ્ટી અડિખમ રહ્યો હતો, તેમ HDFC સિક્યુરિટીઝના રિટેલ રિસર્ચ હેડ દીપક જણાણીએ જણાવ્યું હતું.

ગત સપ્તાહે ઈક્વિટી ઈન્ડાઈસિસ ફ્લેટ બંધ રહ્યા હતા. નબળા વૈશ્વિક સંકેતો તેમજ પ્રોફિટ બુકિંગને કારણે ગત સપ્તાહે રોકાણકારોનું સેન્ટિમેન્ટ ડહોળાયું હતું. 30 શેરોના બનેલા BSE બેન્ચમાર્ક સેન્સેક્સ 81.81 પોઈન્ટ અથવા 0.26 ટકાના સુધારા સાથે 31,138.21 પોઈન્ટની સપાટીએ બંધ રહ્યો હતો જ્યારે નેશનલ સ્ટોક એક્સચેંજનો નિફ્ટી 13.1 ટકા અથવા તો 0.13 ટકા ગગડીને 9,574.95 પોઈન્ટની સપાટીએ બંધ રહ્યો હતો.સોમવારે ઈદ નિમિત્તે શેરબજાર બંધ રહેશે.

Leave a Reply

Your email address will not be published. Required fields are marked *